XIX საერთაშორისო ფესტივალი „საახალწლო მუსიკალური შეხვედრები“

 

საერთაშორისო ფესტივალი „საახალწლო მუსიკალური შეხვედრები“ უკვე მეცხრამეტედ კონსერვატორიის დიდ დარბაზში „ჩექინ ჯორჯიას“ ფარგლებში საქართველოს კულტურისა და ძეგლთა დაცვის სამინისტროს მხარდაჭერით 14 - 28 დეკემბერს ტარდება.

წელს, "საახაწლო მუსიკალური შეხვედრების" ფარგლებში 9 ღონისძიება გაიმართება.

ფესტივალი მოიცავს საფორტეპიანო, კამერული, საორღანო და ფოლკლორული მუსიკის კონცერტებს, ასევე ჯაზის საღამოებს.


მსგავსად წინამორბედებისა, წლევანდელ ფესტივალში მსოფლიოში სახელგანთქმული მუსიკოსები მონაწილეობენ:

♫ პიანისტები: საერთაშორისო კონკურსების ლაურეატი ლუკა დებარგი (საფრანგეთი), ანტონი ბარიშევსკი (უკრაინა) და ალექსანდრე კორსანტია.

♫ მსმენელის წინაშე წარსდგება პოლონელი ორღანისტი მარეკ შტეფანსკი.

♫ რუბრიკა „დებიუტში“ წარმოდგენილია ფოლკლორული მუსიკის კონცერტი - ანსამბლი „ადილეი“.

♫ ფესტივალის ფარგლებში ჯაზის ორი საღამო გაიმართება: აარონ გოლდბერგის (აშშ) და კარელ ბოლეს ტრიო (ნიდერლანდები) დიდი დარბაზის სცენაზე 18 და 19 დეკემბერს დაუკრავენ.


♫ ნორვეგიაში მოღვაწე ქართველი მუსიკოსი კოკა ნიკოლაძე ახალი მუსიკის საღამოს წარმოადგენს.

♫ კამერული მუსიკის კონცერტი ცნობილ ქართველ მევიოლინეს მარინე იაშვილს ეძღვნება.

ფესტივალის განმავლობაში დიდი დარბაზის ფოიეში გურამ თიკანაძის 50-იანი წლების ფოტო გამოფენა იქნება წარმოდგენილი.

„საახალწლო მუსიკალური შეხვედრები“ მანანა დოიჯაშვილის ინიციატივით 1997 წელს დაარსდა. იგი ყოველწლიურად იმართება დეკემბრის მეორე ნახევარში და ორი კვირა გრძელდება.