თბილისის ვ. სარაჯიშვილის სახელობის სახელმწიფო კონსერვატორია

საერთაშორისო სტუდენტური კონფერენცია-კონკურსი
26.10.2015

საერთაშორისო სტუდენტური სამუსიკისმცოდნეო
კონფერენცია-კონკურსი

კონფერენცია-კონკურსის ჩატარების იდეა 2007 წელს დაიბადა. მისი ორგანიზატორები თბილისის სახელმწიფო კონსერვატორიის სტუდენტი-მუსიკოლოგები იყვნენ. მას შემდეგ თანდათან გაცხადდა, რომ კონფერენცია-კონკურსი, თავისი ორიგინალური ფორმატით, მნიშვნელოვანი მოვლენა გახდა, როგორც საქართველოს, ისე საზღვარგარეთის ქვეყნების მუსიკალური მეცნიერების სფეროში.

კონფერენცია-კონკურსის მიზანია ახალგაზრდა მეცნიერების მოტივირება შემდგომი კვლევისთვის, სტუდენტებისთვის პროფესიული უნარ-ჩვევების განვითარება, ინფორმაციის გაცვლა, პროფესიული კავშირების დამყარება სხვადასხვა ქვეყნის ახალგაზრდა მუსიკოლოგთა შორის, კულტურული ურთიერთობების განვითარება ხალხებსა და ქვეყნებს შორის ფუნდამენტური სულიერი ღირებულებების საფუძველზე, რომელთა შორის ერთ-ერთი უმთავრესია მეცნიერება.

პირველი კონფერენცია 2009 წელს ლოკალური მასშტაბით ჩატარდა. მიღებულმა შედეგებმა და შეფასებებმა ორგანიზატორებს მომდევნო წელს მისი საერთაშორისო მასშტაბით ჩატარება გადააწყვეტინა. სხვადასხვა წელს კონფერენცია-კონკურსის საერთაშორისო ჟიური შედგებოდა თბილისის კონსერვატორიის და უცხოელი პროფესორებისგან (გერმანია, ლატვია, საფრანგეთი, მაკედონია, დიდი ბრიტანეთი, ამერიკის შეერთებული შტატები, ბელარუსი). მონაწილეობდნენ სტუდენტები ლატვიიდან, ბელარუსიდან, იტალიიდან, ინგლისიდან, სერბეთიდან, სომხეთიდან, აზერბაიჯანიდან, იტალიდან, ჩინეთიდან, თურქეთიდან, რუსეთიდან, მაკედონიიდან, პოლონეთიდან, ავსტრალიიდან, იაპონიიდან, საქართველოდან.

მონაწილეთა რაოდენობისა და გეოგრაფიული არეალის გაფართოვება კიდევ ერთხელ მიუთითებს იმას, რომ კონფერენცია-კონკურსი აქტუალურია არა მარტო საქართველოში, არამედ მის ფარგლებს გარეთ.
კონფერენცია-კონკურსი თბილისის სახელმწიფო კონსერვატორიაში ყოველწლიურად, აპრილში ტარდება.